Psa 41 | MMX | STEP | Nedi di doma mu solo limixin banbalo, dina momo; Leeme Silok naba lok tooro di mo do dina ekip tangarang mi levenmumuat.

Psalms 41

Lisingising at Laradi Anmeres

1 Nedi di doma mu solo limixin banbalo, dina momo; Leeme Silok naba lok tooro di mo do dina ekip tangarang mi levenmumuat. 2 Leeme Silok naba lok tatao di la naba xok avukat lorooro atnedi; la ni naba sinang di mi lorooro avukat at lenep kangka me Israel; la ni noxo raba arulu di kusu limixin munepen minedi dina lok kapmek di. 3 Dola dina meres, Leeme Silok naba lok tooro di. La ni naba lok kepe levenanmeres basinge di, la na lox alolos manga nedi.

4 Nia aga tong i do, “Nia ara lok pam libilinga ru, Leeme Silok ne Moroa; una belemumu ia la una lox aroo ia.” 5 Limixin munepen minia di vaase kuxurung mumu ia. Di vara i do nia ana met kusu limixin axap dinaba domampe ia. 6 Nedi dit pot pasa ia, di sosolo asu linga rak; la ding senge ka levelinga xapmek mumu ia la dira tere mumu ia at levengkot axap. 7 Nedi ding long angtungun tia, di epaase nemnem mu ia, di nunua i do levempanga xakapmek mo na lok kapmek tino nga ia. 8 Di lok do, “Lanmeres lolos mo ira sogo xaka vam i la ixo epovo do naba roo xat basinge loora mekmeres teren.” 9 Lentangas tino bok tarak, nia aga nunu saga ren; ni ga anan amisik eburu minia, la neni bok ira raba arulu ia.

10 Leeme Silok, una belemumu ia, kusu ana ruuna ka amlong lorooro nunuan, kusu ana sepo amlong loklok atnedi di munepen minia. 11 Di noxo epovo ri sak tup minia, la kerepmo nia anabaklen i do uk lok momo minia. 12 Unaba lok tooro ia, atla nia ak lok amisik levempanga ik mokso; unabat kis esogo eburu minia at levenaleng axap i tu melamgo.

13 Leemi asu ri Leeme Silok, ne Moroa me Israel! Leemi asu rin na, la kopmen tekavaxap teren! Tuturun. Tuturun.